Wir Leupolt von gots gnaden Hertzog ze Oesterreich ze Steyr ze Kêrnden und ze Krain Grave ze Tyrol etc. Embieten unserm getrewn Hainreichen dem Hêkhlein unserm purger zu der Newnstat, unser gnad und alles guet. Als du am nachsten vor unser gewesen bist von der gueter wegen, darumb du und der Potschacher mit einander stoessig seit und gabst uns zu erkennen wie du dartzu gut Recht hettest Also hat uns derselb Potschacher unser Richter fuerbracht wie er derselben gueter lang zeit nuetz und gewer gesezzen sey und du nicht. Und wan aber der hochgeboren fuerst, unser lieber Bruder Hertzog Ernst ew vormals von der sach wegen zu baider seit fûr sich betêget hett, auf den Suntag vor Sand Kolmans tag schierist kûmftigen davon emphelhen wir dir ernstleich, daz du auf denselben tag also her fûr uns und unser Rête koemest und des nicht lassest. So wellen wir ew darumb gen einander verhoeren und yettwederm tail widervaren lassen wartzue er Recht hat. Und daz auch du darauf mit den obgenanten guetern, dem haus, den wein-gerten und den zinnsen nichts ze schaffen noch ze handeln habest in dhainerlay weis. Das ist gêntzleich unser maynung. Geben ze Wienn an Samptztag vor sand Michels tag Anno domini etc. Quadringentesimo Sexto.

Source Fulltext: Peter Peusquens