Ich Nyclas weilnt Hertzog Otten Chamermaister in Osterreich und in Steyer. Und ich Margret sein Hausvrowe wir veriehen und Tun chunt allen den die disen brif lesent oder horent lesen. die nu lebent und her nach chunftig sint. daz wir mit unser Erben gutem willen und gunst mit wol verdachtem muet und mit gesampter hant zu der zeit do wir ez wol getun mochten und mit unsers Gruntherren hant hern Herworts auf der Seul Recht und redleichen verchauft haben unsers rechten perchrechts an funftzehen phennig sechsthalb phunt wienner phennig Gelts und der ligent an drey ein halb phunt auf Jeuten haus der Ringlerinne der Tochainn Tochter in sande Peters freithof . und auf Rudleins haus des Chophler daz da leit gen hern Hagens haus uber von Spilberch . an drei drithalb phunt . und auf Perchtoltes haus des Eder daz da bey leit an drey zwelif Schilling . und da bey auf Ulreichs haus des Freysinger an drey ein halb phunt . und auf Andres haus des wiltpreter daz dar an stozt an drey ein halb phunt . und von einem igleichem vorgenantem haus dient man alle iar hern Herworten auf der Seul drey phennig ze rechtem Gruntrecht . und nach dem selben Gruntrecht . sint die Egenanten an funftzehen sechsthalb phunt Gelts . daz aller erst purchrecht daz auf den vorgenanten heusern leit . und ist auch aller ierleichen ze dienen ze drin Tagen . nach der stat gewonhait ze wienne und auch als purchrechts recht ist . die selben Gult haben wir verchauft und geben mit allem dem Nutz und recht als wir seu unversprochenleichen mer danne recht Tege in rechter purchrechts gewer her bracht haben umb funftzich phunt wienner phennig . der wir gar und gentzleichen verricht und gewert sein . dem Erbern Manne Haunolten dem Schuchler purger ze wienne . und vrown Christein seiner Hausvrown und iren Erben furbaz ledichleichen und vreileichen ze haben und allen iren frumen do mit ze schaffen verchauffen versetzen und geben swem seu wellen als in daz aller pest chome und fuege an allen irresal . Wir sein auch unverschaidenleichen mit sampt unsern Erben der Egenanten Gult ir recht gewer und scherm fur alle ansprach als purchrechts recht ist und der stat recht ze wienne und get in furbaz dar an icht abe mit recht . daz schullen seu haben unverschaidenleichen auf uns und auf allem dem gut daz wir haben in dem lande ze Osterreich wir sein lembtig oder Tode . Und daz diser chauf furbaz also stet sei und unverwandelt beleibe . dar uber geben wir in disen brif zu Einem offen urchunde und zu Einer steten vestigung versigelt mit unserm insigel . und mit unsers vorgenanten Gruntherren insigel hern Herworts auf der Seule und mit meins Swager insigel Mathes hern Hermans sun von sande Polten die diser sache gezeug sint mit iren insigeln . und ander Erber leut genuch . Diser brif ist geben ze wienne . Nach Christes gepurt dreutzehen hundert iar dar nach in dem funf und dreizzigisten iar an aller Hayligen abent.

Source Fulltext: Peter Peusquens