Ich Otte der Hauenlos zu den zeiten purgraf ze Medlich und ich Ofmei sein hausvrowe. Wir vergehen und tuen chunt allen den die disen brief lesent oder horent lesen die nu lebent und hernach chuenftich sind. Daz wir mit aller unser erben gueten willen und gunst mit verdachtem muet und mit gesampter hant zue der zeit do wir iz wol getuen mochten und mit Dietreichs hant von Engelschalichstorf zu den zeiten under Perchmaister der hochgeborn vrowen Hertzoginne Elzbeten. dez edeln hochgeborn Fuersten wittibe Hertzoge Hainreichs in Oesterreich und in Steyr saelig. Verchauft haben unsern weingarten der da leit ze Medlich vor dem Wintal und haizzet der Griezweingart ze naehst Hiersleins weingarten dez Paeusleins. da man alle iar von dient einen halben Emmer weins ze perchreht und einen halben wienner phenninge ze voitreht und nicht mer. Den vorgenanten weingarten haben wir recht und redleich verchauft und geben mit allem dem nutz und recht alz wir in in perchrechtes gewer her pracht haben. Umb fuemf und zwaintzich phunt wienner phenninge der wir recht und redleich gewert sein. Der erbern junchvrowen vron Annen hern Otten Tohter dez Hurnpechen dem got genade und irn erben. fuerbaz ledichleichen und vreileichen ze haben und allen irn frumen da mit ze schaffen verchauffen versetzen und geben swem si wellen an allen irresal. Und dar uber durch pesser sicherhait so setzen wir uns ich vorgenanter Otte der Hauenlos und ich Ofmey sein hausvrowe. und ich Hainreich der Hauenlos sein prueder. zue den zeiten Richter ze Medlich unverschaidenleich mit sampt allen unsern erben. der egenanten junchvrowen Annen und irn erben uber den vorgesprochen weingarten. zue rechtem gewer und scherm fuer alle ansprach alz perchrehtes recht ist und dez Landes recht ze Oesterreich. Waer aber daz si mit recht an dem selben Weingarten dehainen Chriege oder ansprach gewunnen. daz suln wir in alles aus richten an allen irn schaden. Und suln auch si daz haben auf uns und auf allem unserm guet daz wir haben in dem Lande ze Oesterreich wir sein lebentich oder tode. Und daz diser chauf fuerbaz also staet und unzerbrochen beleibe. Dar umb so geben wir ich Otte Hauenlos und ich Ofmey sein hausvrowe. in disen brief zu einem offen urchuende und zu einer ewigen vestnunge diser sache versigilt mit unserm insigil. und mit unsers Obristen Perchmaisters insigil hern Hainreichs von Eysenburch zu den zeiten hofmaister der vorgenanten hochgeborn vrowen Hertzoginne Elzbeten und mit hern Fridreichs insigil des Heuzzen von Lachssendorf die diser sache gezeuge sint mit irn insigiln. und wand ich Hainreich der Hauenlos selber nicht aigens insigils han. so verpint ich mich mit meinen trewen under der egenanten dreier insigiln alles daz staet ze haben und ze laisten daz vor an disem brief geschriben stet. Diser brief ist geben ze wienne nach Christes gepurt dreuzehen hundert iar dar nach in dem fuemf und dreizgistem iar an sant Michels Tage.

Source Fulltext: Peter Peusquens