Ich Swester Ellspet die Haertlinn die zeit Priorinn und der gantz Convent datz sand Peter In der Sperr ze der Newnstat, vergehen offenbar mit dem brief daz uns die Erbern Hanns der Stichel und Hanns der Mosprunner paid purger ze Wyenn aws gericht und betzalt habent, zehen phunt wienner phenning die uns der Erberer Hanns der Arenstaerffer saelig geordent und geschafft hat durch seiner Sel und seiner hawsfrawen frawn Margarethen sel und aller irrer vordern sel hail willen. Also daz wir irrer Sel in unserm andaechttigen gepet gedenkchen und pitten schullen. Der selbigen zehen phunt phenning Sagen wir sew gar und gaentzleich ledig und lozz Mit urchund dez briefs versigilten mit unsers Conventz auf gedrukchten Insigil. Geben an Mitichen vor sand Kathrein tag. Anno domini M(illesim)o Quadringentesimo Septimo.

Source Fulltext: Peter Peusquens