Ich Hainreich der Prawn purger ze Wienn Vergich fuer mich und fuer all mein Erben, und tuen kund offenleich mit dem brief, daz ich mit wolbedachtem muet, und guetem willen, zue der zeit, do ich es wol getuen mocht, mich vertzigen und fuertzicht getan han, und vertzig auch mich, Recht und redleich mit dem brief, gegen meiner Swester, Kathrein Paulen des Chrêmpel haws-frawn, und gegen Irn Erben, des Gewantchelrs gelegen under den Gewelbten Tuchlawben, an dem Hochenmarkcht ze Wienn zenêgst Jacobs Gewantcheler des Chetner an ainen tail, und zenêgst der purger Spital Gewantcheler an dem andern tail. Also daz ich noch all mein Erben fuerbas, auf den egenanten Gewantcheler chain ansprach noch vodrung haben noch gewinnen, weder umb vil noch wenig, Sunder das die vorgenant mein Swester Kathrey, und Ir Erben, suellen fuerbas den-selben Gewantcheler, oder wem Sy den schaft oder geit, gantz und gar, ledigchleich und freyleich haben, und allen Irn frûmen damit schaffen, verchawffen, versetzen, und geben wem Sy wellen, an allen irrsal, und wannd ich selber aygen Insigil nicht han darumb so gib ich fuer (mich) und fuer all mein Erben In den brief ze einem warn urchund der sach versigilten mit der zwaier erbern mannen Insigiln, hern Nyclas des Flusthart diezeit des Innern Rates der Stat ze Wienn, und Petreins des Aldermans purger daselbens, die ich des fleizzichleich gepeten han, das Sy der sach gezeugen sind mit Irn Insigiln In an schaden, darunder ich mich verpind mit meinen trewn an gever, alles das stêt zehaben daz vor an dem brief geschriben stet, der geben ist ze Wienn Nach Kristi gepurd viertzehundert Jar, darnach in dem Achten Jar des negsten phintztags vor Judica in der Vasten.

Source Fulltext: Peter Peusquens