Wir Ernst von gots gnaden Hertzog ze Oesterreich, ze Steir ze Kêrnden und ze Krain, Graf ze Tyrol etc. Bekennen fuer uns und unsern lieben Vettern Hertzog Albrechten der zu seinen Jarn noch nicht koemen ist und den unser lieber Brueder Hertzog Leupolt, und wir Innhaben. Als unser getrewer Hanns der Wuerffl vor unserm lieben getrewn, Hêrtneyden von Potendorff unserm lantmarschalk in Oesterreich, hintz Hannsen dem Griesser purger zu Ibs mit dem Rechten hat behabt, die Geltschuld so er Im nach seiner brief sag ist schuldig als das der behabbrief lauttet, der Im darueber von dem egenanten lantmarschalch gegeben ist, daz wir durch des egenanten Wurffels vleizzig pett zu derselben behabnuess unsern gunst und willen gegeben haben, und bestetten auch die wissentleich mit dem brief was wir daran zerecht bestêtten sullen und muegen, und mainen daz die bey allen Iren krefften beleib nach lautt und sag des egenanten behabbriefs an gevêrd. Mit urkund ditz briefs Geben ze Wienn, an Pfintztag vor sand Johanns tag zu Sunwenden. Anno domini Millesimo Quadringentesimo Nono. dominus dux per se

Source Fulltext: Peter Peusquens