Ich Kathrey, Mertten des Nustorffer ze Wienn hawsfraw, Vergich . Offenleich mit dem brief . Das mir die erbern weysen, her Hanns der Mosprunner und her Oswalt der Pauch dietzeit baid des Rats der Stat ze Wienn und awsRichter des geschêffts so weilent Hanns der Arnstorffer seliger getan hat, gegeben und awsgericht habent zwaintzig phunt wienner phennig, von desselben geschêffts wegen, und sag auch ich und all mein erben die egenanten geschêfftherren und ir erben, der vorgenanten zwaintzig phunt phennig gêntzleich quitt ledig und los, wann Si mich durch gots willen damit bestatt habent . Mit urchund des briefs besigilt mit der zwayr erbern mann Insigiln hern Chlawsen des Prewssen dietzeit Spitalmaister, der purger Spital vor Kernertor ze Wienn, und Thomans des Zinnspan purger daselbs, die ich des vleizzichleich gebeten hab daz Si der sach getzewgen sind mit iren anhangunden insigiln In an schaden. Darunder ich mich mit meinen trewn angever verpind alles daz stêtzehaben daz voran dem brief geschriben stet wann ich selber nicht insigil hab. Geben ze Wienn. Nach Kristi gepurt viertzehenhundert Jar darnach in dem zehenten Jar des nechsten Montags nach sand Pauls tag als er bechert ist.

Source Fulltext: Peter Peusquens