Ich Reinprecht von Walsse Hauptmann, ob der Enns. Bekenn mit dem offenn brief Als ich einen geltbrief han von den..Ersamen weysen..dem Purgermaister .. dem Richter..und dem Rat..der Stat ze Wienn, umb zway Tawsent guldein. Nu habend, die benannten von Wienn, an dem vorgenannten geltt, ausgericht und betzalt. Item von erst, meinem bruder, Fridreichen von Walsse, in ainem seinem quittbrief fuenf hundert guldein. Item, mir in ainem meinem quittbrief hundert, und funftzikch gulden. Item, aber mir in ainem meinem quittbrief, funf hundert guldein. Item Steffann meinem Schaffer in Sechs seiner quittbriefen, vier hundert phund und funf und dreyssikch phund, bringet in gold. Sechs hundert guldein, und drey und dreyssikch guldein, mynner funf und viertzikch phenning, und ist ain yeder guldein umb sechsthalben schilling phenning geraitt. Item so habend Si mir yezund her gesannt pei irem kamrer Thomann dem Velber, zwey hundert guldein, und sibentzehen guldein. Also macht die Summe zway Tawsent guldein. Daromb sag ich die egenanten von Wienn, an dem egenanten geltbrief Quitt ledig und los. Mit urkunt des briefs mit meinem aufgedrukchtem Secret, besigelt. Geben zue Sandpolten am sambstag nach unser frawen tag zu der Schytdung in dem zehenten und virtzehenhundertistem Jar

Source Fulltext: Peter Peusquens