Wir Leupolt von gotes gnaden Hertzog ze Oesterreich ze Steyr ze Kêrnden und ze Krain Graf ze Tyrol etc. Embieten den erbern weysen, unsern getrewn lieben .. dem Burgermeister .. dem Richter, und dem Rate ze Wyenn unser gnad, und alles guet. Umb das geschêfft, So weilent Niclas der Stichl, ewr Mitburger, der erbern Dorothen seiner, und yetzend unsers getrewn Erharts des Haiden, unsers Burgers hie zuo der Newnstat, hausfrawn, hat getan. Emphelhen wir ew ernst-leich, Daz Ir dasselb Geschêfft, unverzogenleich bestêttet, nach derselben unsrer Stat Recht, und gewonhait, und dieselben Dorothen, bey demselben Geschêfft, von unsern wegen, vestekleichen haltet, und schermet, zum Rechten, und nicht gestattet, daz Ir, daran, und an allem anderm Irem Guot, es sey liggend, oder varund, yemand, dhainerlay Invêll, noch Irrung tue, wider Recht, in dhainerlay weys, wan wir maynen daz dasselb Geschêfft, gêntzleich bey seinen krefften beleib, und dawider nicht getan werde. Und des nicht lasset. Das maynen wir. Geben in der Neunstat, an Suntag, nach Sand Niclas tag Anno domini Millesimo Quadringentesimo Decimo. dominus dux per Lueger, came(rarium) s(uum).

Source Fulltext: Peter Peusquens