Ich Alhait die vederlerinne, und ich, Chunrat, ier brueder, wir veriehn, und tun chunt, alln den die disen brif lesent oder horent lesen, die nu lebent, und her nach, chunftig sint. Daz wir mit unser Erben gutem willen und gunst nach unser besten freunt rat, zu der zeit, do wir ez wol getuen mochten, und mit unsers Gruntherrn hant, des Erbern mans, hern Herborts auf der Seule, Recht und redleichen verchauft habn, unser haus daz da leit in der Chernerstrazzene, ze wienne, ze nest Fridreichs haus, des Chertzenmacher, da von man alle iar dient, hern Herborten, auf der Seule, dreu wienner ort ze Gruntrecht, und der Chrannestinne ain phunt, hintz der himelporten, ain halb phunt hintz loech, ain halb phunt, alles ze rechtem purchrecht, und nicht mer, daz selb haus habn wir verchauft und geben mit allem dem Nutz und recht, als wir es unversprochen-leichen in purchrechts gewer her bracht haben. umb sechtzich und zwelif phunt wienner phenning, der wir gar, und gentzleichen gewert sein, dem Erbern manne Nyclasen, dem schuster, und vrouen Margreten, seiner hausvrouen, und iren Erben, furbaz ledichleichen, und vreyleichn, ze habn, und allen ieren frumen, do mit ze schaffen, verchauffen, versetzen, geben swem seu wellen, an allen ierresal, wier sein auch unverschaidenleichn, mit sampt unsern Erben, des Egenanten Hans, ier recht gewer und scherm, fuer alle ansprach, als purchrechts recht ist, und der stat Recht ze Wienne, und get in fuerbaz, dar an icht abe, mit recht, oder ob in dehain chrig dar auf enstunde, den selben chrig schulle wier in danne, allen, auzrichten, an allen ieren schaden, und schullen seu daz haben, unverschaidenleichn auf uns, und auf allem dem guet, daz wier haben, in dem Lande ze Osterreich, wier sein lembtig, oder Tode und, wand wier selber, nicht aygener insigel enhaben, dar uber geben wier in disen brief zu einem offen urchunde, und zu einer steten vestigunge, versigelt mit unsers, Egenanten, Gruntherrn insigel, Herborts, auf der Seule, und mit hern Wilhalms, insigel, bei dem Prunne, die diser sache gezeuge sint, mit iren insigeln, und ander Erber leut genuech. Diser brief ist geben ze wienne Nach Christes geburde, dreutzehn hundert jar, dar nach in dem, acht, und, dreizzigisten jar, an sande Erhardes Tage.

Source Fulltext: Peter Peusquens