Ich Ruger der Tekendorffer purger ze wienne und ich Chlar sein hausvrowe Wir veriehen und tun chunt allen den die disen brif lesent oder horent lesen die nu lebent und her nach chunftig sint daz wir mit unser Erben gutem willen und gunst mit gesampter hant zu der zeit do wir ez wol getun mochten Recht und redleichen verchauft habn ainen zehent des funftzehen lehen ist an ain virtail des zway lehen ligent ze vischamunde und . und aindlef lehen an ain virtail ze Gerstein. und ain lehen zu Deubtal . und ain lehen ze Haslawe mit alle deu und dar zue gehort ze velde ze dorffe ez sei gestift oder ungestift versucht oder unversucht gepaut oder ungepaut swie daz genant ist . und der mich Egenanten Ruger anerstarben ist von vater und von Mueter . und der auch mich dar nach mit rechtem loz und mit furzicht ze meinem tail angevallen ist gen andern meinen geswisteren . und der ze lehen ist von meinem herren hern Harneiten von Liechtenstein . den selben zehent habn wir verchauft und geben mit allem dem Nutz unde recht alz wir in unversprochenleichn in rechter Lehens gewer her bracht haben. umb dreu und sibentzich phunt wienner phennig der wir gar und gentzleichen gewert sein . dem Erbern manne hern Perchtolten dem Pollen purger ze wienne und vrouen Margreten seiner hausvrouen und iren Erben furbaz ledichleichn und vreyleichn ze haben und allen iren frumen do mit ze schaffen verchauffen versetzen geben swem seu wellen an allen ierresal Wir sein auch unverschaidenleichn mit sampt unsern Erben des vorgesprochen zehent ir recht gewer und scherm fur alle ansprach als lehens recht ist und des landes recht in Osterreich . Und get in furbaz dar an icht abe mit recht oder ob in dehain chrieg dar auf enstunde . den selben chrieg schulle wir in danne allen auzrichten an allen iren schaden und schullen seu daz haben unverschaidenleichn auf uns und auf allem dem guet daz wir habn in dem lande ze Osterreich wir sein lembtig oder tode . Und daz diser chauf furbaz also stet sei . und unzebrochen beleibe dar uber gebn wir in disen brif zu Einem offen urchunde und zu Einer steten vestigunge versigelt mit unserm insigel . und mit der Erbern leut insigeln Jansen des Tekendorffer meins bruder . hern Hainreichs von Brunne meins sweher hern Perchtoltes des Geuchramer zu den zeiten chirichmaister datz sande Stephan ze wienne die alle ditz chaufs und diser sache gezeuge sint mit iren insigeln und ander erber leut genuech. Diser brif ist gebn ze wienne Nach Christes gepurde dreuzehen hundert iar dar nach in dem Acht und dreizzigistem iar des nasten samztags vor dem Percht Tage.

Source Fulltext: Peter Peusquens