Ich Hainreich der Stainpech und ich Chuenigunt sein hausvrowe, und ich Wilhalm von Watzmanstorf und ich Chlar sein hausvrowe. Und ich Praun von Steinachirichen und ich Jeut sein hausvrowe, und ich Dietmar von Hadmarstorf und ich Margret sein hausvrowe, und ich Leb der Vierdunge von der Newenstat und ich Elzbet sein hausvrowe, und ich Hainreich der Poltz und ich Katrey sein hausvrowe, und ich Stephan und ich Benisch und ich Dietreich hern Buschken chinder von Horach dem Got genade. Wir vergehen und tuen chunt allen den die disen brief lesent oder hoerent lesen, die nu lebent und hernach chuenftich sind, daz wir mit aller unser erben gueten willen und gunst mit verdachtem muet und mit gesampter hant zue der zeit do wir es wol getuen mochten, verchauft haben unsers rechten an erstorben und Geschaften Erbguetes, daz uns unser Oehaim her Stephan der Chrigler dem Got genade Ledichleich Geschaft hat, daz hernach geschriben stet. Dez ersten so haben wir verchauft mit unsers Gruntherren hant hern Jansen des Greyffen unser haus daz da leit under den Flâeschpenchen bei sant Stephan ze wienne und den Marstal der dar zue gehoeret, gegen dez Poltz haus ueber, da man alle iar von dient hern Jansen dem Greyffen ainen wienner helblinge ze Grundreht und nicht mer. Dar nach so haben wir verchauft mit unser Perchvrowen hant vron Gedrauten hern Otten wittibe dez Haimen dem Got genade unsern weingarten der da leit an dem Hasenekke dez ein jeuch ist der weillen dez Rorer gewesen ist . da man alle iar von dient der egenanten vron Gedrauten drey Emmer weins ze Perchreht und drey wienner phenninge ze voitreht und nicht mer und leit zwischen hern Pilgreims weingarten dez Chitzels und Jansen weingarten dez Murren. Dar nach so haben wir verchauft mit unsers Perchherren hern Chuenrats dez Wiltwaericher unsern weingarten der da haizzet der Zeissel-perch und stoezzet auf die Newenburgerstrazze dez ein jeuch ist da man alle iar von dient zwen Emmer weins ze Perchreht und zwen wienner phenninge ze voitrecht und nicht mer . und leit zwischen dem weingarten der da haizzet der Vrowen Ermel und dez Wuelfleinstorffer weingarten. Dar nach so haben wir verchauft mit unsers Perchherren hant Jansen dez Gmunder unsern weingarten der da leit an dem Alssekke dez fuemf viertail sint. da man alle iar von dient an ein viertail vier (3 ¾) Emmer weins ze perchreht und acht halben (7 ½) phenninge ze voitreht und nicht mer und leit ze naehst der Teutschen herren weingarten. Daz vorgenanten unser Erbguet alles haben wir recht und redleich verchauft und geben mit allem dem nutz und recht alz ez unser vodern und auch wir in Grundrehtes und in Purchrehtes und in Perchrehtes gewer her pracht haben. umb Neun hundert phunt wienner phenninge der wir recht und redleich gewert sein . dem erbern manne hern Fridreichen von Tirnach Purger ze Wienne und seiner hausvrowen vron Annen und allen irn Erben . Fuerbaz ledichleichen und vreileichen ze haben und allen irn frumen da mit ze schaffen verchauffen versetzen und geben swem si wellen an allen irresal . Und wand der vorgenant Dietreich zu seinen rechten iarn nicht chomen ist . und auch ze Lande nicht enist . dar umbe zu einer pessern sicherhait . so setzen wir uns, Ich Hainreich der Stainpeche und ich Chuenigunt sein hausvrowe. und ich Wilhalm von Watzmanstorf und ich Chlar sein hausvrowe . und ich Praun von Stainachirichen und ich Jeut sein hausvrowe . und ich Dietmar von Hadmarstorf und ich Margret sein hausvrowe , und ich Leb der Vierdung und ich Elzbet sein hausvrowe, und ich Hainreich der Poltz und ich Katrey sein hausvrowe . und ich Stephan und ich Benisch hern Buschken Chinder von Horach und alle unser Erben unverschaidenleich fuer uns und fuer den egenanten Dietreichen . und fuer alle unser erben . Uber daz vorgenant Erbguet alles . dem egenanten hern Fridreichen von Tirnach und seiner hausvrowen vron Annen und allen irn Erben zue rechtem gewer und scherm fuer alle ansprach alz Gruntrehtes und Purchrehtes und Perchrehtes recht ist und der stat recht ze wienne und dez Landes recht ze Oesterreich. Waer aber daz si mit recht an dem selben Erbguet allem daz wir in ze chauffen geben haben alz vor an disem brief geschriben stet . dehainen chriege oder ansprach gewunnen von wem daz waer . waz si dez schaden nement daz si bei irn trewen gesagen muegen . daz suln wir in an allen chriege und an alle wider rede alles aus richten und wider chern an alle ir mue und an allen irn schaden . Und suln auch si daz haben auf uns und auf allem unserm Guet daz wir haben in dem Lande ze Oesterreich oder swo wir ez haben wir sein lebentich oder tode. Und daz diser chauf furbaz also staet und unzerbrochen beleibe . dar umb so geben wir In disen brief zu einem warn urchuende . und zu einer ewigen vestnunge diser sache versigilten mit unsern Insigiln . und mit unsers Gruntherren Insigil dez vorgenanten hern Jansen dez Greyffen . und mit unser Perch vrowen Insigil vron Gedrauten hern Otten wittibe dez Haimen . und mit unser Perchherren Insigiln hern Chunrats dez Wiltwaericher . und Jansen dez Gmunder . und mit der Erbern Ritter Insigiln hern Uelreichs von Lozperige zu den zeiten schuetzenmaister in Oesterreich und hern Benisch von Horach . und mit hern Dietreichs Insigil dez Urbaetschen zu den zeiten Richter ze Wienne . und mit hern Chunrats Insigil von Eslarn zu den zeiten Purgermaister ze Wienne . und mit hern Engelprehts Insigil dez Paniken. die alle diser sache gezeuge sint mit irn Insigiln . Diser brief ist geben ze Wienne . do von Christes gepurt warn Ergangen dreuzehen hundert iar dar nach in dem acht und dreizgisten jar an sant Pauls Tage alz er Bechert ward.

Source Fulltext: Peter Peusquens