Wir Swager Hensel, Mertein Teicher, Hensel Greusser, Wentzlaw Toepler Muentzerschopfen in den Smyden, dornach Heyman Alder, Niclas Hebenstreit, Frantz vom Rosental Schopfen in dem Preghaus Bekennen und tun kunt offenleichen mit disem gegenwuertigen brife, allen den die nu sein oder hernach kuenftig werden, das der erber Nicolae Oderwicz hat ein gantzes lediges Ion uf unsers genedigen herren des kueniges Muentzhof zun Chutten und dasselbe Ion gelegen ist in Iglawer smyden und auch darinne ligt recht und redleich dem vorbenanten Nicolae und das egenante Ion in zuhaben und zu behalden und zu besitzen und zu gebrauchen ungehindert vor allermenicleich mit allen dem rechten nuetzen und genisse recht als ein itzleiches lediges Ion recht hat, von der arbait in den smyden, und des toten zu warten von des egenanten lones wegen zu dem egenanten Nicolae und wenn got uber In gepeut So gibt man seinen nesten erben oder wer den gegenwurtigen brif mit recht hat, fumfundsibentzig mark di man dem egenanten Nicolae gibt noch seinem tode. Und zu einer bestetigunge hab wir egenante Schoepfen unser peide Insigel zugezeugnus an disen brif gehangen, der do geben ist noch Cristi gepuert virzehenhundert jar und in dem zwelftem jare der dominiken Adorate 1°.

Source Fulltext: Peter Peusquens