Ich Ditreich der Urbetsch zu den zeiten Richter ze wienne vergich offenleichn an disem brief daz fuer mich chome in die purger schranne ze wienne vor rechtem gericht Albrecht der Teutschen herren schaffer und chlagt mit vorsprechn an seiner herren stat hintz des vogels chrame die da leit an dem Hohenmarcht an des Marcheker eke umb zehen und funf schilling wienner phening versezzens purchrechts und umb die zwispilde die mit recht dar auf ertailt sint. abe were. daz im da geviel. ich solt im boten dar auf gebn, und han im gebn Herman und Merten die zwen vorsprechn. die habnt auch dar umb gesort mit iren treun. als si zerecht solten. daz si die chrame mit sampt den umbsezzen haben beschaut und geschatzt. daz si so tower nicht enist als das Egenant versez-zen puerchrecht und die zwispilde die mit recht dar auf ertailt sint. und dar nach geviel im da mit vrage und mit urtail. er solt mier mein recht gebn daz hat er getan und solt ich in an seiner herren stat der chrame gewaltich machn. und an die guter setzen. daz han ich auch getan den Egenanten Teutschen herren furbaz ledichleichn und vreyleichn ze habn und allen ieren frumen da mit ze schaffen verchaufen versetzen gebn swem si wellen an allen irresal. Mit urchunde ditz briefs versigelt mit meinem insigel der brief ist gebn ze wienne Nach Christes geburde dreutzehen hundert iar dar nach in dem acht und dreizzigistem iar des nachsten freytages vor sande Stephans tage in dem snit.

Source Fulltext: Peter Peusquens