Wier Swester Vromuet von Cheyawe zu den zeiten Priorinne. und der Convent gemain der vrouen in dem Chloster ze Tulln Prediger ordens. veriehn und tuen chunt allen den die disen brief lesent oder horent lesen die nu lebent und her nach chunftig sint daz wier mit wol veraintem muet zu der zeit do wier ez wol getuen mochten Recht und redleichn verchauft habn daz haus daz unser schaffer her Heinraich auf der Seule umb unser versezzens purchrecht und umb die zwispilde die mit recht dar auf ertailt sint mit vrage und mit uertail vor rechtem gericht in unser gewalt bracht hat. als der gericht brief sait den wier dar uber habn. daz da leit ze wienne an dem alten fleschmarcht an dem Eke gen sande Larentzen chloster uber und daz hern Chunrats des Gartner gewesen ist und do wier sechs phunt wienner phennig gelts purchrechts auf habn. die allerierleichn sint ze dienen ze drin tegen. an sande Michels tage. ze weinachten. und an sande Jorgen tage ze einem igleichm vorbenantem tage zwai phunt und auch mit allem dem rechten als man ander purchrecht dint in der stat ze wienne daz selb haus habn wir verchauft und gebn mit allem dem nutz und rechten als ez umb unser versezzen purchrecht in unser gewalt chomen ist, umb vier unde dreizzich phunt wienner phennig der wir gar und gentzleichn gewert sein. dem erbern manne hern Perchtolten dem Pollen purger ze wienne und vrouen Margitten seiner hausvrouen. und iren erbn furbaz ledichleichn und vreyleichn ze habn und allen iren frumen do mit ze schaffen verchauffen versetzen gebn swem si wellen an allen ierresal. wier sein auch des selben haus ir recht gewer und scherm fuer alle ansprach als purchrechtes recht ist und der stat recht ze wienne. Get in aber furbaz dar an icht abe mit recht. daz schullen si habn auf uns und auf allem dem guet daz zu unserm chloster gehort wier sein lembtig oder tode. und dar uber zu einem offen urchunde diser sache gebn wier in disen brief versigelt mit unsern insigeln. Diser brief ist gebn Nach Christes geburde dreutzehen hundert iar dar nach in dem acht und dreizzi-gistem iar an sande Ulreichs abent.

Source Fulltext: Peter Peusquens