Wir Mathes fluegel Lucas muentzer Wentzlaw topler Purkart von Rosental muentzerschopfen in den smyden. Dornach Hanman Alder Hannus vom Pyesk Hannus swab schopfen in dem Preghaus Bekennen offenleichen mit diesem gegenburtigen brive allen den die nu sein oder hernoch kunftig werden, das der erber man Heinreich flemmyng goltsmid auf dem Perg zun Chutten hat gekauft Im und seinen nesten erben ein virteil eyner smiden wider den ersamen man Paul meyler etwenn Perkschreiber des Pergs zun Chutten umb fumftzig schock grosser guter prager pfenning dy der egenante Heinreich flemyng dem vorgenanten Paul meyler mit bereytem gelde gantz und gar betzalt hat, und dasselbe virteil einer Smyden gelegen ist auf unsers genedigen herren kuniges Muentzhoff des Perges zun Chutten genant in der Iglawer smiden, In dasselbe virteil einer smiden zuhaben zuhalden zugenissen und zugeprauchen erbicleich und ewicleich mit allen den rechten nutzen als ein Itzleicher Werkmeister ein virteil einer smiden recht und redleich besitzen sol vor allermenicleich ungehindert, und wer den gegenburtigen brif mit recht hat dem gepueren alle vorgeschribne recht, und zu einer bestetigunge dieser sache haben wir egenanten Schopfen unser paide Insigil zugetzeugnus an diesen gegenburtigen brif gehangen der do geben ist noch Cristi gepuert virtzehenhundert jar dornach in dem Sechtzehentem jar der dominiken als man singet Misericordia domini.

Source Fulltext: Peter Peusquens