Wir Albrecht von Gots gnaden Hertzog ze Osterreich, ze Steir, und ze Kernden, Tuen chunt offenlich mit disem brief, umb die hundert ember perchrechtes, di da ligent in den Siben Schozzen, in dem nidern horde, und dar zuo immer ouf den ember drey phenning vogtrechtes, und vierzehen schilling geltes daselbs auf weingarten, di ab zeloesen sint, immer dreizzig phenning geltes, mit eim phunt wienner phenning, und den zehenden ze Entzestorf, chlainen, und grozzen, auf fuemf gantzen lehen, und den zehenden ze Nidern Newensidel da bey, auch auf fuemf gantzen lehen chlainen und grozzen, und was darzue gehoert, daz unser getrewer Haunolt der Schuehler chouft hat, recht, und redleich, von unsern getrewen, Marcharten, und Erchenbrechten, bruedern von Mistelbach, der, dasselb guot, aygens, und anerstorbens erbguot gewesen ist, daz si uns willichleich, und ledichleich auf geben habent. Dasselb guot, haben wir, dem obgenanden Haunolten dem Schuehler, und allen seinen erben, suenen, und toehtern, verlihen ze rechtem lehen, und loben im diselben lehen ze schermen, vor allem gewalt und unrecht nach des Landes recht. Und des ze uorchund, geben wir im disen brief versigelten mit unserm Insigel, der geben ist ze Wienn am vreytag in der Osterwochen, Nach Christes gepurt, dreuzehen hundert jar, im Neun und dreizzigistem jar.

Source Fulltext: Peter Peusquens