Ich Ludweig Osterreicherder Sneider purger ze wienn und ich Diemuet sein hausfraw Vergehen fuer uns und alle unser erben und tuen kund offenleich mit dem brief umb die vier phunt wienner phenning gelts purkchrechts die wir dem erbern Jeronym dem Gewkramer purger ze wienn ver-chaufft und ze kauffen gegeben haben der dieselb guelt gechaufft hat zu der ewigen mezz die sein en her Perchtolt der Gewkramer seliger auf sand Kathrein Altar under dem Nêwn Turên datz sand Steffen ze wienn gestifft hat und die wir derselben mezz auf unserm haws gelegen an dem hochen marcht ze wienn zenêgst, weillent des Swêmleins haws nach der Statrechten ze wienn verschriben haben nach des purkrechtbriefs sag daruber gegeben darumb geloben wir mit unsern trewn und verpinden uns mit krafft des briefs gegen dem vorgenanten Jeronym dem Gewkramer und seinen erben das wir die benanten vier phunt gelts purkchrechts nicht ze aintzigen sunder miteinander abloesen wellen und sullen, und sullen In damit den nêgsten dienst der dann davon ze dienen gepueret ausrichten angevêr Das sullen Sy haben datz uns und unsern erben unver--schaidenleich und auf allem dem guot das wir haben in dem lannd ze Osterreich oder wo wir es haben Wir sein lebentig oder tod und wann wir selber nicht aigen Insigel haben Des ze urkund geben wir fuer uns und all unser erben In den brief besigelten mit der zwair erbern man Insigel Hannsen des Gerestener und Symans des zyngiezzer paid Purger ze wienn die Sy durch unser gepet willen In an schaden zu getzewgnuzz der sach an den brief habent gehanngen, darunder wir uns verpinden alles das stetzehaben das vor an dem brief geschriben stet Der geben ist ze Wienn an Sambstag nach sand Jorgen tag Nach Kristi gepurd viertzehenhundert und in dem Newnt-zehenten Jare.

Source Fulltext: Peter Peusquens