ICH Swester Kathrey dietzeit Priorin und wir der gantz Convent gemain des frawnklosters datz Tullen Bekennen fuer uns und all unser Nachkomen und tuen kund Allen lewten gegenbuertigen und kuenftigen umb die vier phunt gelts purkrechts die wir und unser gotshaws vor lanngen Jaren gehabt haben auf weilent Michels des Chuenrêwtter haws gelegen an dem Altenfleischmarkcht ze Wienn zenegst dem haws das weilent Michels von Ymppendorf seligen gewesen ist und damit derselb Michel Chuenrewtter das benant haws gekaufft hat nach begreiffung seins kaufbriefs und wann wir ermont sein das dieselbe gult von unsern vordern ist abgeloest. Dartzue haben wir uns, in allen unsern urbarpuechern briefen und registern aigenleich versucht und haben nichts funden, das uns umb soleich gult gefrumen, und daran getzaigen moecht. Darumb sagen wir das egenant haws am altenfleischmarkcht syder genant des Hofgeber haws gantz quitt ledig und los aller dinst und gult die unserm gotshaws zugepuren solten untz auf disen hewtigen tag Als datum des briefs stet. Mit urkund des briefs besigelten mit unser der obgenanten Priorin und des Convents Anhan-gunden Insigeln Geben ze Wienn an phintztag nach sand Mathias tag des zwelifpoten Nach Kristi gepurd viertzehenhundert und in dem Zwaintzigistem Jare.

Source Fulltext: Peter Peusquens