Ich Pruder Fridreich von Tullen dietzeit Prior und wir der Convent gemain des klosters prediger Ordens ze wienn Bekennen mit dem brief fur uns und all unser nachkomen das wir uns verlubt und verpunden haben geloben und verpinden uns auch wissentleich mit kraft des briefs gegen der erbern frawn Kathrein Michels des Stadls hausfrawn die emaln Marharten den Stadl auch hat eleich gehabt, das wir demselben Marcharten Stadl und der benanten Kathrein vater Hannsen dem Stadl und Elsbethten seiner hausfrawn irer mueter einen ewigen Jartag begen sullen und wellen in dem benanten unserm kloster jerleich acht tag vor sand Augustins tag oder acht tag hinnach nach unsers Ordens gewonhait darumb hat Sy uns gegeben zehen phunt wienner phenning die wir zu unsres klosters notturfft angelegt und bewenndet haben Mit urkund des briefs besigelten mit unser vorgenanten pruder Fridreichs Prior und des Convents Anhangunden Insigeln Geben ze Wienn an Sambsttag vor unsers Herren Auffarttag Nach kristi gepurd virtzehenhundert und in dem zwaintzigisten Jare.

Source Fulltext: Peter Peusquens