Ich Hanns Weinpergêr burgêr ze Wienn Vergich fuer mich und all mein erben und tuen kund offennleich mit dem brief Allen lêuten, gegenbuertigen und kuenftigen das ich mit guetem willen und wolbedachtem muet zu der zeit da ich es wol getuen mocht und mit hannden des erbern weisen Ulreichen des Gundloch dietzeit Muenssmaister in Osterreich Recht und Redleich verkaufft hab mein halbe wechselpankch gegen sannd Stephan uber und den andern halben tail derselben wechselpankch Hanns Atzinger gegen mir hat und ist die dritt von dem liechtensteg hinauf mit all den Eren wuerden und Rechten und gueten gewonhaiten als die benant wechselpankch, geleich halbe von alter herkomen ist und in dem Rechten als ander hausgenossen wechselpenkch Recht ist umb zwaintzig phunt wienner phenning der ich gantz verricht und gewert pin dem vorgenanten erbern mann Hannsen dem Atzinger burger ze Wienn und seinen erben oder wem er die schafft macht oder geit fuerbas ledichleich und freileich ze haben und allen iren frumen damit ze schaffen verkauffen versetzen schaffen geben und machen wem Sy wellent und alles das damit tuen und hanndeln das in aller pest fuegtt oder wolgevellet vor aller Irrung Ich pin auch vor-genanter Hanns Weinperger mitsambt meinen erben unverschaidenleich der vorgenanten halben wechselpankch des egenanten Hannsen des Atzinger und seiner erben oder wem er die schafft macht oder geit Recht gewern und scherm fuer alle ansprach als anderr hausgenossen ze wienn wechselpenkch Recht ist Ging in aber daran icht ab oder stuend in icht krieg oder ansprach daran auf von wem das wêr mit Recht was Sy des schaden nement das sullen wir in alles ausrichten und widerkeren an allen iren schaden und sullen Sy das haben datz mir und meinen erben unver-schaidenleich und auf allem dem guet das wir haben in dem lannde ze Osterreich oder wo wir es haben wir sein lebentig oder tode und das der kauf fuerbas also stet und unzebrochen beleib Des zu ainem waren urkund gib ich fur mich und all mein erben in den brief besigelten mit des vorgenanten Ulreichs Gundloch Muenssmaister Anhangundem Insigel dartzue hab ich vleissichleich gepeten den erbern weisen Paulen den Wuerffel dietzeit des Rates der Stat ze Wienn das er sein Insigel zu getzeugnuezz der sach Im an schaden an den brief hat gehanngen darunder ich mich verpind stetzehaben das vor geschriben stet Der brief ist geben ze Wienn an freitag vor dem Palm tag Nach Kristi gepurd viertzehenhundert Jare und darnach in dem Ains und zwaintzigisten Jare.

Source Fulltext: Peter Peusquens