Den Ersamen weysen .. dem Burgermayster .. Richtter und .. dem Rate der Stat ze Wienn Empeut ich Swester Anna die Waitzinn Conventswester des Geistleichen frawenchlosters ze Tullen mein andechtigs gepet in got. Ich lass ew wissen, daz ich meinem lieben brueder Chunraten dem Waitzen ewerm mitburger verkaufft und ze kauffen geben hab Alle die tail und Rechten so ich gehabet hab an dem haws gelegen an dem hochenmarkcht, und stosset an weylennt Niclas des Wurffels haws ze wienn, das mich und meine geswistreid von unserm lieben brueder Petern dem waytzen seligen anerstorben und ledig worden ist Als er ew des ain geschriben kaufbrief zu-bringen und zaigen wirdet Bitt ich ewr weishait mit vleyss Ir wellet Im denselben kauf vertigen mit ewerm Gruntinsigil nach ewrer Stat gewonhait Daz ist gentzleich mein willen .. Mit urkund des briefs und wann ich selben nicht aigen insigel hab, so hab ich vleissichleich gepeten dew erwirdigen Geistleichen frawn Swester Kathrein Priorinn des obgenanten Gotzhaws ze Tullen, daz Sy ir Insigel an meiner stat zu getzeugnuss der sach auf den brief gedrukcht hat, Darunder ich mich verpind stetzehaben daz vor geschriben stêt. Geben ze Tullen an sannd Giligen tag Anno etc. vicesimo primo.

Source Fulltext: Peter Peusquens