Wir Albrecht von gotes gnaden Hertzog ze Oesterreich, ze Steir, ze Kêrnden, und ze Krain, Grave ze Tyrol etc. Embieten unsern lieben getrewn .. allen unsern hauptleuten, herren, Rittern und Knechten, Phlegern, Burggraven, Burgermaistern, Richtern, Burgern und allen andern unsern ambtleuten und undertanen, den diser brief getzaigt wirdet, unser gnad und alles guet. Wir haben vernomen, wie daz vil ungrischer wein in unser land und, dadurch gefuert werden von leuten, die des nicht recht haben. daraus uns und unserm lande merkleich schêden geen. Emphelhen wir ew allen, und ewr yecleichem besunder ernstleich und wellen, wa ew unser hannsgraf, oder ander unser ambtleut, auf solich wein zaigen, die in unser land und dadurch gefuert werden, von den, die des nicht recht habent, daz Ir denselben, unsern ambtleuten beystendig und hilfleich seyt, damit dieselben wein verheftet und aufgehalten werden zue unsern handen, daran tuet Ir gêntzleich unser maynung. Geben ze Wienn an freitag vor Sant Matheus tag. Anno etc. vicesimo secundo. dominus dux in consilio

Source Fulltext: Peter Peusquens