Ich Elspet Berngers wytibe dem got gnade, vergich und tun chunt. allen den die disen brief lesent. oder horent lesen. die nu lebent. und hernach chunftig sint. daz ich mit gueten willen, und gunst, meiner erben mit verdachtem muete, zu der zeit, da ich ez wol getuen mochte, und auch mit des Gruntherren hant, des erbern Priesters hern Otten des Gnemhertelins, zu den zeiten chapplan. unser vrowen auf der Stetten ze wienne, Recht und redlich verchauft han, ayn halb phunt wienner phenninge, gelts, puerchrechtes, daz ich gehabt han, auf Ulreichs haus des slozzer, des Payres, daz da leit pei sand Stephan, zenahst Eberharts hause, des slozzer. da von man dient alle iar ze Gruntrecht drey wienner phenninge, daz selbe vorgenante halb phunt gelts puerchrechtes han ich verchauft und geben mit allem den nutze und rechte als man mir ez . e . gedient hat. und ich ez unversprochenlich in purchrechts gewer herpracht han. umb, vierdhalb phunt phenninge wienner muntze. der ich gar und, gantz verricht und gewert pin, dem erbern manne, hern, Hawenolden, dem schueheler, puerger ze wienne und seinen erben. furbaz ledichlichen und vreylichen ze haben und allen seinen frumen da mit ze schaffen verchauffen versetzen. und geben swem Er will. an allen irresal. So beschaidenlichen, daz man im, daz selbe purchrecht furbaz alle iar da von dienen sol. zu drin zeiten in dem iar, virtzich phenninge, an sand Michels Tage, viertzich phenninge ze Weynnachten. und virtzich phenninge an sand Georgen Tage, unverzogenlich in allem dem rechten. als man ander purchrecht dient. in der stat ze wienne. Ich pin auch des selben halben phunt gelts purchrechts, auff dem egenanten haus unverschaidenlichen mit sampt meinen Erben, furbaz, sein rechter scherm und gewer fur alle ansprach als purchrechts recht ist, und der stat recht ze wienne. Und daz diese Rede furbaz also stete sei, und wand ich selber aygens Insigels nicht enhan. dar uber so gibe ich im disen brief ze einem offen urchunde, und ze einem waren gezeuge, versigelten mit des vorgenanten Gruntherren Insigel hern Otten des Gnemhertelins chapplan. datz unser vrowen auf der stetten ze wienne, und mit Stephans Insigel. des Chezzeler hern Antonii aidem, auff der Wydem, die diser sache gezeuge sint. mit irn Insigeln. Diser brief ist geben ze wienne. nach Christes gepurt. dreutzehen hundert iar. darnach in dem virtzigistem iar. an Gotes Leychnames Tage. Das ist der prief umb ½ phunt geltes auf des slosser haus vor sand Stephan.

Source Fulltext: Peter Peusquens