Ich Andre Ich Dietreich und Ich Jacob gebrueder die Kêser weilent Ulreichs seligen des Kêser Sun Wir veriehen fuer uns und all unser erben und tuen kunt offenleich mit dem brief gegenwuert-tigen und kuenftigen, Daz wir mit guetem willen und wolbedachtem muet zu der zeit da wir es wol getuen mochten, und mit handen hern Kunrats des Holtzer zu den zeiten Burgermaister und des Rats gemain der Stat ze Wienn Recht und redleichen verkaufft haben zway phunt und Syben schilling wienner phenning gelts purkchrechts auf unserm haus gelegen in der Kumphlukchen vor Kernertor ze Wienn zenêgst der Deutschenherren Mayrhof umb drewundzwaintzig phunt wienner phenning, die herkomen sind von der Sindramynn haus gelegen auf sand Stephans freythof, die man damit abgeledigt und geloest hat, und der wir gantz und gar verrichtt und gewert sein Dem erbern herren maister Ulreichen pharrer zu Wulderstorff und kapplan der ewigen mess so die erber fraw..die Sindramynn auf aller heiligen Altar zu sant Stephann ze Wienn gewidemt und gestifft, und seinen Nachkomen kapplenen derselben ewigen mess fuerbazzer Inntzehaben zenutzen und zeniessen als ander guelt und gueter die zu demselben Altar gehoerent. In der maynung daz wir und alle die die das vorgenant haus fuerbasser Innhabent und besitzent In die egenanten guelt fuerbasser alle Jar davon raichen und dienen sullen zu drin zeiten im Jar zu sant Joergen tag, zu sant Michels tag, und zu Weichnachten, zu yedem diensttag Syben schilling und zwaintzig wienner phenning der swartzen Muenss mit allen den nuetzen und rechten als man ander purkchrecht in der Stat ze Wienn dient und wenn der dienst versessen wirdet so ist vor dem Statrichtter in der Burgerschrann ze Wienn auf das egenant haus umb zwispild ze klagen ze viertzehen têgen als umb versessens purkchrecht und der Stat ze Wienn Recht ist. Es sind auch die vorgenante guelt auf dem egenanten haus wider abtzeloesen ze aintzigen oder miteinander ye ain phunt gelts umb Acht phund wienner phenning an allen krieg. Wir sein auch mitsambt unsern erben unverschaidenleich der vorgenanten guelt auf dem egenanten haus Ir Recht gewern und Scherm fuer alle ansprach als purkchrechts und der Stat ze Wienn Recht ist und was In mit Recht daran abgeet daz sullen Sy haben zu uns und unsern erben unverschaidenleich und auf allem unserm guet daz wir haben in dem land ze Oesterreich oder wo wir das haben nichts ausgenomen wir sein lebentig oder tod Und wan wir selb aigen Insigel nicht enhaben des zu urkund geben wir In den brief besigelten mit der vorgenanten Stat ze Wienn GruntInsiegel darzu haben wir gebeten den erbern man Lienharten den Newnhofer Burger ze Wienn daz er der sach zeug ist mit seinem anhangundem Insigel Im und seinen erben an schaden darunder wir uns verbinden mit unsern trewn angevêr alles das stêtzehaben daz vor geschriben steet. Geben ze Wienn an Montag nach dem Suntag Quasimodogeniti Nach Kristi gepurd viertzehenhundert Jar darnach in dem drewund-zwaintzigisten Jare.

Source Fulltext: Peter Peusquens