Andreas dei gratia Episcopus Victricensis In Pontificalibus Vicarius Episcopus Pataviensis Universis et singulis presentes litteras inspecturis Salutem in domino. Litteras Reverendissimi in christo patris domini domini Jordani, miseratione divina Episcopi Albinensis Eius vero Sigillo impendente, ut prima apparebat facie sigillatas, sanas et integras, omnique prorsus vitio, et suspitione carentes, Nobis per dilectum in christo Johannem de Villa Scolarem Pataviensem cum ea qua decuit reverentia recepimus per omnia in hec verba. Venerabili in christo patri domino Andree dei gratia Episcopo victricensi vicario in Pontificalibus Episcopi Pataviensis. Jordanus miseratione divina Episcopus Albanensis. Salutem et sinceram in domino caritatem. Ex parte Johannis de Villa Scolaris Pataviensis nobis fuit humiliter sup(p)licatum ut cum eo qui sicut asseritur ascribi desiderat militie clericali super defectu natalium quem patitur de presbytero genitus et soluta, quod huiusmodi non obstante defectu, ad omnes possit ordines promoveri, et beneficium ecclesiasticum obtinere, etiam si curam habeat animarum sedes apostolica dispensare misericorditer dignaretur. Nos igitur auctoritate domini pape, cuius penitentiarie curam gerimus. Et de eius speciali mandato, super hoc vive vocis oraculo, nobis facto, paternitati vestre com-mittimus, quatenus si est ita consideratis diligenter, circumstantiis universis, que circa ydonei-tatem persone fuerint attendende, si paterne non est incontinentie imitator, sed bone conver-sationis et vite sufficientisque litterature, super quibus vestram conscientiam oneramus, aliaque merita sibi suffragantur, ad huiusmodi dispensationis gratiam obtinendam, secum super petitis misericorditer dispensetis. Ita tamen quod Idem Scolaris prout requiret, onus beneficii quod eum post dispensationem huiusmodi obtinere contigerit, se faciat, ad ordines statutis a iure tempori-bus promoveri, et personaliter resideat in eodem alioquin dicte dispensationis gratia, quo ad beneficium ipsum, nullius penitus sit momenti. Datum Constantie kal. Decembris Pontificatus domini Martini pape quinti anno primo. Post quarum quidem litterarum presentationem, et recepcionem fuimus per dictum Johannem de Villa Scolarem, debita cum instantia requisiti quatenus commissionem, nobis per litteras easdem factam exequi dignaremur. Nos igitur volentes, iuxta commissionem eandem procedere ut tenemur, de vita et conversatione, dicti Johannis Scolaris, et aliis in dictis litteris contentis inquisivimus diligenter. Et quia ex fide dignorum testimonio, quos super hac vite recepimus, invenimus dictum Scolarem bone vite et conversationis honeste, sufficientisque litterature, nec esse Imitatorem paterne incontinentie, et alia in dictis narrata, et contenta litteris veritate fulciri Aliaque sibi merita suffragari ad huiusmodi dispensationis gratiam obtinendam, cum eo super premissis, per ipsum, auctoritate apostolica, nobis in hac parte tradita, misericorditer dispensamus iuxta dictarum litterarum continentiam, et tenorem. In quorum omnium, et singulorum evidens testimonium presentes litteras fieri, ac Sigilli nostri appensione fecimus communiri, et roborari. Datum et actum Patavie, anno domini millesimo quadringentesimo vicesimo tercio, die vero decima nona Mensis Marcii, Presentibus ibidem testibus fidedignis ad premissa vocatis in fidem et testimonium premissorum.

Source Fulltext: Peter Peusquens