Ich Paul der Grewsser Burger ze Wienn und Ich Agnes sein hausfraw veriehen fur uns und all unser erben und Nachkomen und tuen kund offenleich mit dem brief umb unser melstat gelegen an dem Graben am Tumbrobsthof ze Wienn zenêgst der klainen Tuer mit der keten an aim tail und an dem andern tail zenêgst maister Niclas des parlier des Stainmetzen von Krembs melstat, und wan aber dieselb unser melstat mitsambt dem obgenanten Tumbrobsthof auf der egenanten Stat ze Wienn Grunt ligt und dieselb melstat furpaw ist und uns und unsern vordern menigermal von der Stat abgesagt ist worden darumb wir und unser vordern mit zinsen mit der egenanten Stat ze jerleichen abkomen sein Also sein wir yetz mit derselben Stat umb ainen genanten jarzins ab-komen wissentleich mit dem brief also daz wir und alle die, die die genante melstat Innhabent und besitzent der egenanten Stat ze Wienn ierleichen davon zu furvang raihen und dienen sullen Ain phunt wienner phenning gelts zu drin zeiten Im Jar zu yder dienstzeit Achtzig phenning mit allen den nutzen und Rechten als man andern dienst der Stat ze Wienn dienet und sol das die egenante Stat haben auf uns unsern erben und Nachkomen und auf der egenanten melstat und auf allem unserm gut wir sein lebentig oder tod und daruber zu ainem waren urkund geben wir fur uns unser erben und Nachkomen der egenanten Stat den brief besigelten mit der zwair erbern mann Insigeln Hannsen des Ungern dietzeit hannsgraf in Osterreich und Hannsens von Friesach Burger ze Wienn die Sy durch unserr fleissigen gebet willen zugetzeugnuss der sach in und Iren erben an schaden an den brief habent gehangen und wan wir selb nicht aigen Insigel haben So verpinden wir uns under die egenanten Insigel mit unsern trewn angever stêtzehaben das vor-geschriben stet. Geben ze Wienn an Mantag vor sand Mertein tag Nach kristi gepurd viertzehen-hundert Jar darnach in dem drewundzwaintzigistem Jare.

Source Fulltext: Peter Peusquens