Ich Hanns Gotesprunner dietzeit des Hochgeboren fuersten Hertzog Albrechts Hertzogen ze Osterreich etc. meins genedigen herren Schenck vergich fuer mich und all mein erben und tuen kund offenleich mit dem brief allen leuten gegenwurtigen und kunftigen daz Ich mit guetem willen und wolbedachtem muet zu der zeit da Ich (es) wolgetuen mocht und mit handen des erbern manns Pauln des Wuerffels dietzeit des Rats der Stat ze Wienn und Spitalmaister der Burgerspital vor Kernertor daselbs verkaufft hab mein wisen gelegen ze Symoning der zweliff tagwerch sind zenegst der Deutschen herren wisen ze Wienn daman von der egenanten wisen jêrleich dient der Burgerspital vor Kernertor ze Wienn Sechtzig wienner phenning an sand Michels tag ze gruntrecht und nichts mer Dieselb wisen hab Ich recht und redleich verkaufft und geben mit allen nutzen und Rechten als ich die unversprochenleich in gruntrechts gewer herbracht hab und als die von alter herkomen ist umb zwaintzig phund wienner phenning der ich gantz und gar verrichtt und gewert bin Dem erbern briester hern Stephann dietzeit pharrer underm Pusemberg und verweser der ewigen Mess die weilent Hanns der Reikêr auf dem newn Korner datz aller-heiligen Tumbkirchen zu sand Stephan ze Wienn gewidembt und gestifft hat und sein Nachkomen verwesern derselben ewigen mess und die derselb her Stephan umb sein ledigs varundsguet durch seiner Sel hails und durch pesserung willen derselben ewigen mess dartzu gekaufft hat, furbasser Innzehaben zenutzen und zeniessen als ander gult und gueter die zu der vorgenanten ewigen mess gehornt vor aller Irrung angever Ich bin auch mitsambt meinen erben unverschaidenleich der obgenanten wisen Ir recht gewern und scherm fur alle ansprach als Gruntrechts und des Landes ze Osterreich Recht ist wer aber daz In icht krieg oder ansprach davon auferstuenden von wem das wêr mit Recht oder ob In mit Recht daran icht abgieng was Sy des schaden nement daz sullen wir In alles ausrichten und widerkern an allen Irn schaden und sullen Sy das haben daz mir und meinen erben unverschaidenleich und auf allem dem guet daz wir haben in dem Land ze Osterreich oder wo wir das haben Wir sein lebentig oder tod, und das der kauff furbasser also stet und unzebrochen beleib daruber zu ainem warn urkunt gib Ich In den brief besigelten mit meinem anhangundem Insigel, und mit des obgenanten Spitals ze Wienn anhangundem GruntInsiegel. Geben ze Wienn an Mitichen nach sand Gregorien tag Nach Kristi gepuerd viertzehenhundert jar darnach in dem vierundzwaintzigistem jare.

Source Fulltext: Peter Peusquens