Ich Agnes weilent Jacoben des Suessen seligen tochter Conventswester in der Ersamen geistleichen frawn kloster, hintz sand Jacob auf der huelbn ze wienn vergich fur mich und all mein erben und tuen kund offennleich mit dem brief allen lewten gegenwurttigen und kunftigen, von wegn aller der zuspruech vordrung und Rechten, so Ich gehabt hab und hinfuer gehaben moecht zu allem dem guet Erb varundem guet nichts ausgenomen so dann der vorgenant mein vater seliger hinder sein lassen hat, fur dieselben mein zuspruch vordrung und Rechten all hat mir der erber mein lieber bruder, Hanns der Suess, Achtzigk phunt beraiter gueter wienner phenning der swartzen munss ausgericht und geben, daran mich wol genueget und hinfur genugen sol, und davon so hab Ich mich mit gutem willen mit wolbedachtem muet, und mit willen und gunst der Ersamen geistleichen Swesster Kristein der Zebingerynn Maysterynn des benantn frawnklosters datz sand Jacob und des ganntzen Convents daselbs gegen dem yetzgenanten meinem lieben bruder Hannsen dem Sussen allen anndern meinen brudern und Iren erben Recht und Redleich vertzigen alles meins obgenantn vêterleichen erbtails, und vertzeich auch mich des fur mich und all mein erben gegen In wissentleich mit dem brief In solicher maynung und mit ausgenomen warten, das wir furbas hintz In, dhainerlay zuspruch vordrung noch Recht von des benanten meins veterleichen erbtails wegen nymermer haben noch gewynnen sullen noch wellen weder mit Recht noch an Recht geistleichem noch weltleichem in dhain weis ungeverleich Und das die gegen-wurttig vertzeichung furbaser also stet und untzebrochen beleib Des zu ainem waren urkund gib Ich In den brief besiglt mit der vorgenanten Swester Kristein der Zebingêrynn maistrynn des obgenanten frawn klosters hintz sand Jacob und des gantzn Convents daselbs Anhangunden Insigeln. Geben ze Wienn an Montag nach sand Urbans tag Nach Kristi geburd viertzehenhundert und in dem vierundzwaintzigisten Jare.

Source Fulltext: Peter Peusquens