Ich Hainreich der Frankch dietzeit des Rats der Stat ze Wienn und Ich Clement der Rorvogel Burger daselbs, und zu den zeiten baid verweser des hauss der bekerten frawn, datz sand Jeronimus ze Wienn. Wir veriehen fur uns, und unser Nachkomen, und tuen kund offenleich mit dem brieve, daz wir dem erbern herren, Maister Stephan von Pulka, zu den zeiten obristen kaplan der egenanten kappelln sant Jeronimus, mit willen und mit handen der ersamen weisen hern Kunrats des Holtzler, zu den zeiten Burgermaister, und des Rats gemain der Stat ze Wienn, ver-lassen haben, das halb haus, gelegen ganz daselbs, zu sand Jeronimus, zenêgst des vorgenanten haus, datz sand Jeronimus, den tail zenêgst der Gassen Also mit ausgenomen worten, daz der vorgenant Maister Stephan, der vorgenanten Stat, ausrichten und betzalen sol zwelif phunt wienner phenning, und wenn er das getan hat, so sol er das vorgenante halbhaus denn sein lebttêg stifftleichen und pawleichen Innhaben, niessen, und nuetzen, unverkumert, untz an seinen tod, als leibgedings und der Stat Recht ist, und nach seinem tod sol denn dasselb haus ledicleichen gevallen dem vorgenanten haus, datz sand Jeronimus vor aller Irrung. Wêr aber, daz die vorgenant Stat, der obgenanten zwelif phunt phenning, von dem egenanten Maister Stephann nicht ausgericht wuerd, so sol die vorgenant Stat ze Wienn dieselben zwelif phunt phenning haben auf dem egenanten haus, und der davon bekomen, soverr dazu Sy der gantz und gar verricht und gewert wirdet, und darueber zu ainem warn urkund geben wir dem vorgenanten Maister Stephann den brief besigelten, mit meinem egenanten Hainreichen Frankch anhangundem Insigel, und mit der vorgenanten Stat ze Wienn GruntInsigel, und wan Ich obgenanter Clement Rorvogel nicht aigen Insigel enhab, So verbind Ich mich under den egenanten Insigeln, mit meinen trewen angever stetzehaben daz vorgeschriben stet Geben ze Wienn an Montag nach sand Lucein tag Nach Kristi geburd viertzehenhundert jar darnach in dem vierundzwaintzigistem jare.

Source Fulltext: Peter Peusquens