Ich Gorig Stewdel vergich offenleich mit dem brieff Allen den die den brieff lesent oder hoerent lesen das ich vollen gewalt geben hab, und auch aufsendt meiner lieben hawsfrawen frawen Kathrein die uberdeuerung unsers haws gelegen ze wienn in der vôrdern pekchenstrôss zenachst des Starkchen Hainreichs saligen haws uber die geltschuld die wir vor darauf gelten schuellen unserm lieben Aydem Mêrten dem Ranynger, das Sy damit tue und handel was ir am pesten fuegt und alltzeit wolgeffelet In geleichêr weys, alls ich albeg enkegen wer und darzue pitt ich mit allem vleizz die erbern weysen Leupolt den Weiler, die zeit des Râts der Stat ze Wienn und Caspar den Pirichfelder puerger daselbs, und baid die zeit Inhaber, der Stat Gruntpuech zu Wienn das seu der egenanten meiner hawsfrawen frawen Kathrein soliches gewalts alls vor benant ist In der Stat grûntpuech ze wienn, an deu gewêr schreiben lasset und des zue ainem waren urchuend So gib ich vorgenanter Gorig Stewdel der egenanten Kathrein meiner hawsfrawen den offen brieff ver-sigelt mit der Edeln Ruedolfs des Schiermer, die zeit hofrichter zue sand Florian und Thomans Imwald die zeit zechentner ze Gomêrhing baider aufgedruekchten Insigeln die ich vleizzigleichen darumb gepeten hab das seu zue getzewgnuezz der sach Irre Insigel auf den brieff aufgedrukcht habent, doch in baiden und all Iren eriben an schaden, under die vorgenanten Insigel Ich mich vorgenanter Gorig Stewdel verpinde mit meinen trewn an aydes stat alles das war und stet ze haben das an dem brieff geschriben stet wenn ich selb aygen Insigel die zeit nicht enhett. Der brieff ist geben nach christi gepuerd viertzehenhundert jar darnach in dem fuenf und zwaint-zigisten jare, am mentag vor dem heiligen Auffêrttag.

Source Fulltext: Peter Peusquens