Wir Albrecht von gotes gnaden, Hertzog ze Oesterreich, ze Steyr, ze Kernden, und ze Krain, Marggraf ze Mêrhern und Graf ze Tyrol etc. Embieten unsern lieben getrewn .. allen Herren, Rittern und Knechten, Burggrafen, Burgermaistern, Richtern, Burgern, Gemainen, und allen andern unsern undertanen und getrewn, edeln und unedeln, wie die genant, oder wa die in unserm Lande ze Oesterreich niderhalb der Enns, in Steten und auf dem Lande gesessen sind, den der brief gezaigt wirt, unser gnad und alles gut. Wir lassen ew wissen, daz uns gewisse warnung koemen ist, und noch tegleich kuemt, wie sich die Hussen [an] unsern Gemerkchen vast sammen und mainen ye merkleich schêden in unsern Landen ze tuen. Und wan wir dem edeln, und unsern lieben getrewn graf Johannsen von Maidburg, Otten von Meissaw obristen Marschalchen und Schenkchen in Oesterreich, Hêrtneiden von Potendorf, Leupolten von Ekkartzaw, unserm Hofmaister, Hannsen vonn Winden unserm Lantmarschalch, Hannsen von Eberstorf obristen kamrer in Oesterreich, und Pilgreimen von Puchaim dasselb unser Land zu Oesterreich in unserm abwesen, als wir yetz bei unserm gnêdigen herrn..dem Roemischen kuenig sein, empholhen haben zu verwesen Emphelhen wir ew allen, und ewr yegleichem besunder und begern gar ernstleich, ob dieselben unser Anwêlt, Si, all miteinander oder ettleich under In, ew in der zeit, und wir nicht zu lande sein, von der egenanten Hussen wegen, vordern wuerden, daz ir dann all berait und auf seit getzeugt, so ir pest und sterkest mueget, und In wider die vorgenanten Hussen zu hilf zu ziehet an soelich stet, dahin Si ew vordern, und ew des nichts saumen noch irren lasset, als wir ew des sunder wolgetrawn, und als ir uns, ew selber, land und leuten des schuldig und phlichtig seit. Wan wêr des nicht tête, den wolten wir swêrleich darumb schaffen zu pessern. Auch emphelhen wir ew ernstleich, daz ir das in allen unsern und ewrn gepieten, in Steten, Mêrkten, und auf dem Lande oeffenleich lasset beruffen, nach lautt der beruffzedel, die man ew hiemit wirt antwuertten. Daran begeet ir gêntzleich unser maynung. Geben zu der Plintenpurg an sant Johans abent ze Sunewenden Anno etc. vicesimo quinto. d. d(ux) in cons(ilio).

Source Fulltext: Peter Peusquens; siehe auch: • Wretschko in den Blättern des Vereines für Landeskunde von Niederösterreich, N. F. 32, 77.