Albrecht von gotes gnaden Hertzog ze Oesterreich und Markgraf zu Mêrhern etc. Erbern weisen und lieben getrewn. Uns ist angelangt, wie ettleich kaufleut zu Wienn, Kuppher, Czin, Pley, Salniter, Swebel, und ander solich war, verkauffen, die den veinden zuegefuert, und damit gesterkt werden, das uns und unsern land und leuten zu grossem merkleichem schaden kuempt. Empelhen wir ew ernstleich und wellen, daz Ir mit den kaufleuten, daselbs, bestellet, und von unsern wegen ernstleich schaffet, daz Si in solichen war zu verkauffen fuersichtig sein, und die nyemant verkauffen, damit unser veind gesterkt werden, Sunder was Si derselben war verkauffen wellen, daz Si das tuen mit ewrm wissen und willen und daz Ir dann fuersehet, damit die, den veinden nicht zuegefuert werde, als ew des unser getrewr, Hanns von Rorbach Hofmarschalch und Lantrichter zum Grêwtschenstain, lautter wird underweisen, dem gelaubt darinn gêntzleich als unsselber. Geben zu Korn Newnburg an Mittichen vor sant Andrees tag. Anno etc. vicesimoquinto. d(ominus) d(ux) in cons(ilio)

Source Fulltext: Peter Peusquens