Wir Albrecht von gotes gnaden, Hertzog ze Oesterreich, ze Steir, ze Kêrnden, und ze Krain, Marggraf ze Mêrhern, und Graf ze Tyrol etc. Embieten unsern lieben getrewn..allen unsern Haubtlêuten, Herren, Rittern und Knechten, Phlegern, Burggrafen, Burgermaistern, Richtern, Burgêrn, und allen andern, unsern Ambtlêuten, und undertanen, geistleichen und weltleichen, den diser brief getzaigt wiert, unser gnad und alles guet. Wir sein kuntleich und aigenleich underweiset, daz von solhen newen Weingêrten, und Greffen, die man an menigern enden unsers Lands, von Ekchern gemacht hat, und noch têgleich anfvahet, und machet, wir und unser Inwoner, und undertanen, zu merkleichen schêden kômen sein, und hinfuer zu grossen schêden und verderben kômen moechten, wan damit unser landwein, unwerd, und wolfail, und das getraid des nyemant empern mag, armen lêuten, und mênicleich tewr wierdet. Emphelhen wir ew allen, und ewr yegleichem besunder, daz Ir allenthalben, in Steten, und auf dem Land, schafft offen-leich ze berueffen, das nu fuerbazzer, nyemand, in welhem wesen, oder stande der sey, kainen newen weingarten, weder auf Ekchêrn, noch auf anderlay erdreich in unserm Lande nicht anfvahe, noch mach in dhain weis. Und wer das darueber tête, den wolten wir darumb swêrleich schaffen zu pessêrn, und wa Ir auf soelich Weingêrten und Grêffen koemet, daz ir die, an vertziehen schaffet zu vernichten, und ze prechen, und lasset des nicht, wan wir das ernstleich mainen. Geben ze Wienn an Phintztag vor dem Suntag Oculi in der Vasten. Anno etc. vicesimo sexto. d(ominus) d(ux) in cons(ilio).

Source Fulltext: Peter Peusquens