Wir Hanns Scharffenperger Burgermaister Niclas Undermhimel StatRichter..der Rate und die Burger gemainkleich der Stat ze Wienn. Bekennen fuer uns und all unser Nachkomen und tuen kund offenleich mit dem brief daz wir unverschaidenleich gelten sullen dem Edeln herren hern Jorgen dem Stuchsen von Trautmansdorff frawn Margrethen seiner hausfrawn hern Otten von Stubenbergk des eltern seligen tochter und allen Iren baiden erben zwaitausent guter ungrischer guldein gerecht in gold und wag, der wir Si oder wer uns an Irer stat mit dem brief mont un-vertzogenleich ausrichten und betzalen sullen wenn Si die an uns vordernt, und der nicht lenger empern wellent, darnach in ainem Moneid an alles vertziehen, hie ze wienn in der Stat, oder zu Trautmansdorff, oder wellent er dietzeit wesend und Sesshafft ist ungeverleich. Têten wir aber des nicht was Si denn desselben Irs gelts nach der obgenanten frist schaden nement von welherlay sachen das sey oder wie der schad genant wirdet den Si oder wer uns an Irer stat mit dem brief mont bei Iren trewn mit slechten worten ungesworn und an all ander bewêrung gesprechen muegen denselben schaden mitsambt dem obgenanten haubtgut sullen und wellen wir In allen ablegen und widerkeren an allen Iren schaden das geloben wir In stêtzehaben und zevolfuern mit unsern trewn angever. Si sullen auch haubtgut und schaden haben zu uns und unsern Nachkomen unverschaidenleich und zu allem dem gut daz zu der vorgenanten Stat ze wienn gehoret und wer auch den brief mit Irem guetleichen willen Innehat und uns damit monet, dem sein wir alles des gepunden, zegelten und zevolfuern umb haubtgut und schaden ze geleicher weis als In selben. Und daruber zu ainem warn urkund so geben wir In den brief besigelten, mit unser vorgenanten Stat ze wienn grossem anhangundem Insigel Dartzu so haben wir mit fleisse gebeten den Ersamen herren hern Wilhalmen den Tuersen Brobst Allerheiligen Tuombkirchen datz Sand Stephan ze Wienn und den Edeln herren hern Hannsen von Puochaim daz Si der sach getzeugen sind mit Iren anhangunden Insigeln In und Iren erben an schaden. Geben ze Wienn an Mitichen nach des heiligen Krêwtz tag als es erhoecht ward Nach Kristi geburde viertzehenhundert Jare darnach in dem Sechsundzwaintzigistem Jare.

Source Fulltext: Peter Peusquens