Den erbern weisen .. dem Burgermaister .. Richter und .. dem Rate zu Wienn, unsern guten frewnden. Embieten wir .. der Burgermaister .. Richter und .. der Rat zu der Newnstat, unsern frewntleichen dienst. Wir lassen ew wissen, daz weilent Hanns Hêkchel, unser Mitburger sêliger, sein halbs haus, gelegen zu Wienn, in der Wollzeil, zenagst Klawsen des Prewssen haus, des Ir Gruntherren seit, zeverkauffen geschafft, und uns dasselb sein Geschefft auszerichtten und zevolfueren empholhen hat, nach lautt seins Geschefftbriefs darumb gegeben Nuo haben wir dasselb halb haus, verkaufft Mathiasen dem Wisler Burger ze Wienn, als Ir das an dem kauffbrief den wir Im, mit unserr StatInsigl versigelt, darumb haben gegeben, aigenleichen vernemen werdet. Bitten wir ew mit allem fleiss, Ir wellet denselben kauffbrief, als Gruntherren des obgenanten halben hauss mit ewrr Stat GruntInsigel vertigen, als kauffs vertigung bey ewrm Gruntpuech sit und gewonhait, wan das unser guetleicher willen ist Das wellen wir umb ew und die ewrn frewntleichen verdienen. Mit urkund des briefs besigelt mit unserr Stat klainem aufgedruktem Insigel. Geben zu der Newnstat an freitag vor Reminiscere in der Vasten Nach Kristi gepurd Viertzehenhundert Jar darnach in dem Newnundzwaintzigistem Jare.

Source Fulltext: Peter Peusquens