Unseren dienst bevor. Erbern weisen besundern guenner. Als wir eurer erberkeit vormals vorschriben haben . von eyns gelts und klaynat wegen . das dy Stephanyn Beynissyn unser mitburgerin und Irer varyger Man dem got genad zu trewn henden hatten zu halden geben . und das darnach pey frumen lewten euren mitburgern ist nydergelegt und gefunden worden . und haben gepeten . das Ir dartzu woldet beholfen sein . das der unsern dasselbig geret also widergeantwort wurd und den Iren . als se es zu trewn henden getrawt haben . Nu worden wir underweist . wie ewer Burgermaister sich der sach unterwunden hett dye zurichten . das sich doch pys her hat verzogen den unsern . darumb wir oft syder Im hynauf potschaft getan haben . und die Fraw mit Irem Man . mer den eyn wys auch darumb getan hat . Wir haben aber der sach keyn end nicht moegen haben . Sunder maynyge ausred sein uns furpracht worden . die darunder geschehen sein . Und darumb biten wir ewer erberleiche weishait mit allem fleisse . das ir woellet der unsern beholfen sein . das Ir dasselbig widervar . an eynval wenn sy sich derpewt In unser Statrecht gantz und gar zuthun nach ausweisung des rechtens . ob yemand zu Ir ader zu den Iren ichts von der sach ader ander sach wegen zusprechen hett . So woellen wir auch einem yettleichen ein furderleich recht lassen widervarn . und das wollen wir umb ewr erberkait steticleichen verdienen . Geben zu Prespurg am Mitichen vor dominicam Oculi Anno domini etc. XXIX. Richter und der Rat der Stat zu Prespurg.

Source Fulltext: Peter Peusquens