Wir Pruder Fridreich der Chleber ze den zeiten Cardyan Mynnerpruder Ordens ze Wienne. und der Covent gemain do selbens. Veriehen und tuen chunt offenlichen mit disem brief. Das wir emphangen haben leuterleichen durch Got. von dem erbern manne hern Dytreichen dem Urbetschen ze den zeiten Stat Richter ze wienne fumf phunt wienner phenninge. umb ainen Ewigen jartage. den wir in unserm Chloster alle jar begen schullen des nachsten Mentages nach dem Auffart Tage umb hern Hermannes sele von sand Polten dem Got genade. seiner vodern sele und allen Gelaubigen selen ze hilfe und ze Troste. Darzue wir uns verpunden haben mit unsern Trewen alle jar Chunt ze tuen den nachsten Vreunden die denne sint. des vorgenanten hern Hermannes von sand Polten oder hern Dytreichs des Urbetschen. wenne wir den jartage begen schullen. Den schullen wir begen. Mit Vygilie mit selmezze. und mit gepet an alle saumpnizze. Und ze ainem urchunde so geben wir in disen brief versigilten mit unserm Covent anhangunden insigil. Diser brief ist geben ze wienne nach christes gepuert dreutzehen hundert jar darnach in dem ayn und viertzigistem jar an sand Benedicten Tage in der Vasten.

Source Fulltext: Peter Peusquens