Wir Leonart von gots genaden Bischoff ze Passaw. Bekennen daz fuer uns kame, unser getrewr lieber Hawnold der Schuchler, und bate uns diemutiklich an stat sein selbs, und Petern und Joergen seiner gebrueder, In zuverleihen den zehend ze Perberstorff, auf zwain lehen ganntzen zehend unser und unsers Gotzhaus lehenschafft, wanne der Ir erbe wêre. Das haben wir also getan und haben In und allen Iren erben dieselben zehend alle mit Irer zugehoerung verlihen, und leihen die auch wissentlich in krafft des briefs, was wir daran In zerechte leihen suellen, oder muegen Also daz Sy die nu fuerbasser von uns und unserm Gotzhaus in lehensweis Innehaben, nuetzen, und nyessen muegen, als lehens und lannds recht ist ungeverlich, wir sein auch der Ir herre und scherm als lehens und lannds recht ist, nach unser und unsers Gotzhaus auch rechten und gewonheiten, angeverde. Mit urkunde ditz briefs. Geben ze Wienn an Mitwochen vor Pfinngsten als man tzallt nach Christi gebuerde viertzehen hundert und darnach in dem Newnundzwaintzigisten jaren.

Source Fulltext: Peter Peusquens