Ich Hanns Scheiblwiser dietzeit Spitalmaister der Burgerspital vor Kêrnêrtor ze Wienn. Bekenn offenlich mit dem brief, umb den weingarten gelegen im Hard, auf den Rusten, des ain viertail ist, der mit frawn Elsbeten der Herwartin tod dem egenanten Spital ledig worden ist, und den Ich Albrechten dem Ritzl zekauffen gegeben hab, nach laut des kaufbriefs den er darumb hat, und den der erber herr Mert dietzeit sand Moranden Cappellen der von Tirna stifftung Caplan als Gruntherr besiglt und gevertigt hat. Davon so verpind Ich mich fur mich und mein Nachkomen Spitalmaister des vorgenanten Spitals, gegen den benanten Caplan und seinen Nachkomen wissentich mit dem brief Ob In hinfuer in Rechten têgen, umb die benant vertigung des vor-genanten weingartens, icht krieg oder ansprach auferstuenden, von wem das wêr mit Recht, waz Sy des schaden nement, daz sullen Sy haben, auf allem dem gut daz zu dem egenanten Spital gehoret ungeverlich Mit urkund des briefs versorgt mit des benanten Spitals aufgedruktem petschad Geben zu Wienn an Mantag vor des heiligen krewtz tag exaltacionis Anno domini etc. vicesimo nono.

Source Fulltext: Peter Peusquens