Ich Niclas Brobst zu Tyrnstain. Und wier der gantz Convent gemain daselbs Bekennen das uns die erbern Maister Erhart Taschnêr burger zu Wienn, und Kathrei sein hawsfraw ausgericht und betzalt habent Achtzigk phunt wienner phenning die bruder Hainreich unser Conventbruder der benanten frawn Kathrei sun gehabt hat auf dem haws gelegen bey Peylertor ze Wienn, zwischen des .. Hubmaister und des Hewssen Guertler hewser von seins vaterleichen Eribtails wegen, und achtzehen phund wienner phenning, die derselb unser Conventbrueder auch von seins vaeter-leichen Eribtails wegen gehabt hat auf dem haus gelegen pey sand Steffan daselbs zu Wienn zwischen Wilhalms des Merttinger und Bertlmes des Pêtzolten sêligen hewser, umb dieselben obgemelten Summ geltes sagen wier fuer uns und all unser nachkoemen, den egenanten Erharten Taschnêr, Kathrein sein hawsfrawnn, und auch den satz der benanten zwair hewser, gantz quitt ledig und los. Mit urkund des briefs, besigelt mit meinem obgenanten des Brobst zu Tirnstain und des gantzen Convents daselbs baider aufgedrukchten Insigeln. Gegeben ze Wienn an freytag nach Sand Matheus tag des zwelifpoten und Ewangelisten. Nach Kristi gepuerd viertzehenhundert und in dem neun und zwaintzigistenn Jare.

Source Fulltext: Peter Peusquens