Wir nochgeschribin Niclos Hicko und Burghard von Loben bede mittburger zu Ofen bekennen mit diesem keigenwartigen unserm brive Allen den er fuerkomt die en sehen ada hoeren, Als uns der Erber Cristoff Gurman dem Got genade sein Testament mit fleissiger bete, an seinem letzten ende, beffolen und getrawt hat zu forschen und auszurichten, noch lawte und ausweisung desselben, beschriben Testamentes, under der Stat zu Ofen Ingesigel besigelt, das wir dach, von manichffeldiger hindernis wille unser eigen, notdurfft nicht haben ausrichten mogen, als wir noch benerung seines letzten willen, gern getan hetten, Dovon zo habe wir, das selbe Testament, mit wolbedachtem guten willen und gemuete, furbas uffgeben, und mit erste bevolen, Dem Erbern man Jacob Hauser mitburger zu funffkirchen, und frawn Anna seiner elichen hawsfraw, des obgenanten Cristoffs kindes mutter und das Testament, mit follem gewalt und gantz macht, noch Irn trawn, zu tun und zu lassen dem kinde zu nutze und zu gute, und seines vater sele zu heile und zu zelikeit, noch iren besten gewissen als sy das am letzten, kein gote varantwarten muessen, darumb zu bekentnis, hab wir beyde unser petzet auffgedruckt Geben zu Ofen am nasten heretag vor sand Andree Czwelffboten tag, Anno domini M° CCCC° tricesimo etc.

Source Fulltext: Peter Peusquens