Ich Niclas Waldner burger ze Attenshaim Vergich fur mich und all mein erben und tun kund offen-lich mit dem brief das Ich mit gutem willen und wolbeachtem mut zu der zeit do Ich es wol getun mocht Recht und redleich vertzigen und furzicht getan hab, und verzeich mich auch wissentlich in kraft des briefs gegen der erbern frawn Elspeten Niclasen Spehen des Giesser ze Wienn hausfrawn meiner lieben Swester und Irn erben aller meiner gerechtikait und Erbschafft So Ich hab an den dreyn weingerten ainer gelegen am Renweg des ain viertail ist zenagst Niclasen des Goeschlein weingarten der ander gelegen daselbs am Renweg des auch ain viertail ist zenagst der Eberstorf-ferinn weingarten und der dritt gelegen auf dem Jeus des auch ain viertail ist zenagst des Kollrer weingarten die mich und die egenant mein Swester weilent von junkchfrawn Elspeten Thomans des Mênharts seligen Tochter anerstorben und darnach von dem Rat der Stat ze Wienn mit Recht zugesprochen sind nach Innhaldung ains Statbriefs der darumb ist In solher beschaiden das Ich noch mein erben noch ander yemants von unsern wegen hinfur hintz der egenanten meiner Swester noch zu Iren erben umb die egenanten Erbgueter dhainerlay gerechtikait Erbschaft zuspruech noch vordrung haben noch gewinnen sullen noch wellen, weder mit worten noch mit werchen, mit Recht noch an Recht in dhainer weis Das gelob Ich In fuer mich und mein erben gentzlich stetzuhaben mit meinen trewn ungeverlich Sunder die obgenant mein Swester und Ir erben sullen nu hinfur all mein gerechtikait und Erbschaft so Ich an den egenanten Erbguetern solt oder môcht haben ledikleich und freileich haben und allen Iren frumen damit schaffen als mit anderm Irem aigenhaftem guet ungeverleich Mit urkund des briefs besigilt mit der erbern weisen Ulreichs des Hirssawer Statschreiber ze Wienn und Micheln des Muenichner burger daselbs Anhan-gunden Insigiln die Ich zu gezeunuss der sach mit vleiss darumb gebeten hab In und Iren erben an schaden Darunder Ich mich mit meinen trewn verpinnd stetzuhaben sovor geschriben stet. Geben ze Wienn an Eritag nach Allerheiligen tag Nach kristi gepurd viertzehenhundert jar darnach in dem Ainsunddreissigistem jare.

Source Fulltext: Peter Peusquens