Wir Thoman Hadmar dechant Ich Sigmund Schelhel kuster und korherr Allerheiligen Tumbkirchen datz sand Steffan ze Wienn, und Ich Steffan Wirsing dietzeit des Rats und kirichmaister der benanten sand Steffans Tumbkirchen, Bekennen fuer uns und unser Nachkomen und tun kund offenleich mit dem brief, das uns die Erbern weisen..her Konrat der Hoeltzlêr zu den zeiten Burgermaister und der Rat gemain der Stat ze Wienn, ausrichtter und volfûrêr des gescheffts, so weilent der erber Hanns Kriech der kuersnêr getan hat, ausgericht Ingeantwurtt und gegeben habent, von ersten ainen vergulten kopf, der da wigt bey dritthalben markchen, ain vergulte mernus, ainen silbreinen pechêr und zwaintzig silbrein loeffel, das er alles zu sand Steffan geschafft hat, unser fraun heiligtum damit ze vassen, alsverr das gelangen mag, nach Inhaldung seins gescheffts das In dem Statpuch ze Wienn geschriben stet, darumb sagen wir sy los, Mit urkund des briefs, versorgt mit unsern Aufgedrukten petschaden. Geben an Mitichen vor Pauli Conversionis, Anno domini etc. Tricesimo secundo.

Source Fulltext: Peter Peusquens