Universis Christi fidelibus presentes litteras inspecturis. Nos miseratione divina. Philippus Salernitanus, frater Johannes Turritanus, frater Basilius Jerosolemitanus Armenorum Archiepiscopi, frater Matheus Veglensis, Andreas Venafranus, Adam Marturanensis, Stephanus Oppidensis, Ildebrandinus Aretinus, frater Lambertus Aquinas, frater Stephanus Balneoregensis, Leonardus Aversanus, frater Ciprianus Bovensis, frater Romanus Croensis et Lando Suanensis, Episcopi, salutem in domino sempiternam. Excelsa super sydera virgo virginum quem genuit adoravit imarcessibilem (immarcescibilem) florem et fructum videlicet primogenitum mortuorum qui sicut pluvia in vellus descendit in ea ut salvum faceret genus humanum. Hec enim regina celi omnium carismatum prefulva fulgoribus miserie humane compatiens in conspectu filii sui regis eterni pro nostre reconciliationis federe non desinit advocare, ut eius ne pereamus nobis propitiam efficiat gratiam cuius cuius (sic !) livore sanati sumus. Ut igitur omnis lingua consurgat in iubilum ante thorum huius virginis in templo eius maxime nomine insignito frequentare dulcia cantica dra(g)matis gemmas spiritualis ecclesie impertiri largiflue renati fonte sacri baptismatis delectemur. Quapropter cupientes ut Capella Beate Marie Virginis de Wienna Pataviensis diocesis, que in eiusdem virginis est insignita vocabulo frequentia honoretur et circa eam querentium dominum tanto ferventius devotio ferveat quanto (h)abundantius spirituales thesauros ibidem reppererit in celesti ierusalem perheniter (perenniter) profuturos. Omnibus vere penitentibus et confessis qui ad dictam capellam in omnibus et singulis festivitatibus Beate Marie Virginis gloriose in Nativitate Resurrectione Ascensione domini et Pentecosten in Commemoratione Omnium Sanctorum in festivitatibus apostolorum Petri et Pauli et omnium aliorum apostolorum nec non in Beatorum Stephani, Laurentii, Nicolai, Martini et Patroni ipsius atque Beatarum Marie Magdelene, Margarete, Caterine, festivitatibus causa devotionis et orationis accesserint et ibidem missam audierint vel pro pace universalis Ecclesie oraverint mente pia, aut qui ad fabricam eiusdem capelle, ornamenta, luminaria, vestimenta, libros, campanas vel aliis quibuscumque dicte capelle necessariis manus porrexerint adiutrices. Aut qui in bona sui corporis sanitate seu etiam in extremis laborantibus quicquam facultatum suarum legaverint modo licito (ecc) capelle supradicte. De omnipotentis dei misericordia et Beatorum Petri et Pauli apostolorum eius auctoritate confisi singuli nostrorum singulis de iniuncta eis penitentia. Quadraginta dierum indulgentias misericorditer in domino relaxamus. Dummodo diocesani voluntas ad id accesserit et consensus. In cuius rei testimonium presentibus nostra sigilla iussimus apponi. Datum Rome die XX° mensis februarii Pontificatus domini Bonifatii pape VIII. anno quarto. Et nos Albertus dei et apostolice sedis gratia Episcopus Pataviensis supradictas indulgentias a dictis Reverendis in Christo patribus provide concessas, ratas et gratas habentes et quadraginta dies indulgentiarum adicientes ipsas quantum iure efficatius possumus auctoritate ordinaria confirmamus. Sub anno domini Millesimo Trecentesimo Septuagesimo tercio, die IX. Mensis Novembris.

Source Fulltext: Peter Peusquens