Ich Mertt Scheibelwisêr mitburgêr ze Wienn Bekenn offenlich mit dem brief. Daz mir der erber Symon Poetl burger ze Wienn und fraw Magdalen seine hausfraw , die emaln Hannsen den Scheibelwisêr meinen Bruder seligen auch elich gehabt hat, gegeben und Inngeantwurtt habent, alles das gut, das mir der benant mein bruder seliger geschafft hat nach Innhaldung seins ge-scheffts das in dem Statpuch ze Wienn geschriben stet. Davon sag ich Sy und Ir erben fuer mich und all mein erben desselben guts alles gêntzleich quit ledig und los. Und sullen auch Ich noch mein erben fuerbas hintz In von alles des guts wegen, das der obgenant mein bruder seliger gehabt und hinder sein gelassen hat, wie das genant ist, nichts ausgenomen kainêrlay zuspruch noch vordrung nicht mer haben noch gewinnen, weder mit wortten noch mit werchen mit Recht noch an Recht in kainer weis, das gelob Ich In fuer mich und all mein erben gêntzlich stêtzehaben an alles gevêr Mit urkund des briefs besigilt mit der erbern weisen Petern des Reneys diezeit des Rats der Stat ze Wienn und Ulreichs Hirssawêr Statschreibêr daselbs Anhangunden Insigeln. Die Ich zugeugnuess der sach mit vleiss darumb gebeten hab In und Iren erben an schaden Darunder Ich mit meinen trewn bekenn alles des so vorgeschriben stet. Geben ze Wienn an Montag vor der Aindlef Tausend Maid tag Nach Cristi gepurd virtzehenhundert Jar. Darnach in dem zwayund-dreissigistem Jare.

Source Fulltext: Peter Peusquens