Ich Linhart Newnhover Statrichter zu Wienn Bekenn offenlich mit dem brief, das fur mich kom in der Burgerschrann, da Ich sas daselbs an offem gericht, der erber Veit von sand Ulreich der kursner burger zu Wienn und klagt mit vorsprechen hintz Pawllen Staintêschl mitburger daselbs seinem vorfluchtigen Gelter, als er dieselb vorflucht, mit dem freyungmaister, datz den Schotten zu Wienn, hintz Im beweist und bracht hat, als er zu recht solt umb Ainnundreissig ungrischer guldein in gold, die er Im schuldig wêr und gelten solt. Darumb er Im die ubertewrung hawses und was dartzue gehort, uber die zway phunt phenning geltz purkrechts, so der erber Briester her Erhart Greif Capplan der andern mess auf sand Kathrein altar gelegen datz den Himelporten zu Wienn vormallen darauf habe und ligt dasselb haws in der Trabaten strass gegen der Rinkchmawr uber, zenêgst Hannsen Frolichs des kursner haws mit ainem tail, mit dem gericht in verbot und heftung genommen und gelegt hiet nach der Stat rechten zu Wienn, und wêr auch darauf der erst mit dem verbot. Und klagt auch nach demselben verbot und weisung der egemelten vorflucht solang, untz das mit frag und urtail geviel Ich solt In der obgenanten ubertewrung hawses, und was dartzue gehort gêntzlich gewaltig machen, mit meinem Gerichtsbrief Also das er die handeln sol nach der Stat rechtten zu Wienn, Soverre das er der obgenanten Ainnunddreissig guldein davon verrichtt und gewert werde und solt Ich Im des mein urchund geben, darumb solt er mir mein recht geben das hat er getan Des zu einem offen waren urkunt gib Ich Im den brief besigilten mit meinem Angehangem Insigil. Geben zu Wienn an Freitag nach des heiligen Krêwtz tag als es erfunden ward. Nach Cristi gebuerd virtzehenhundert Jar und darnach In dem drewunddreissigistem Jare.

Source Fulltext: Peter Peusquens