Ich Wernhart dietzeit verwêser ze Ruespach Ich Jorig der Wymêr und Ich Hanns der Tyrwart baid gesessen ze Awrestal Bekennen offenleich mit dem brief, fuer uns und all unser nachkomen, das uns die Erbern weisen Niclas Undermhymel, Muenssmaister, und des Rats der Stat ze Wienn, und Caspar Pirchvelder burger daselbs, und baid der benanten Stat Gruntpuech verwesêr Ingeant-wuertt und gegeben habent Achtt und viertzigk phunt wienner phenning haubtguets, und vier und zwaintzigk phunt phenning diensts, die von Niclasen des Tanner haws wegen zu demselben Gruntpuech nidergelegt sind worden, und die zu dem Gotshaws ze Awrestal gehorent, davon sagen wir fur uns und all unser nachkomen, die egenanten Niclasen Undermhymel, und Casparn Pirchvelder, und all Ir nachkomen, der vorgenanten Summ phenningen haubtguets und diensts gantz und gar quitt ledig und los vor aller ansprach und vordrung ungeverleich Mit Urkund des briefs Besigilten mit der Erbern Wolfharten des Dorn und Taman des Farmueser baid burger ze Newnburgk markthalben, die wir mit vleiss darumb gebeten haben, das Si der sachen getzeugen sind mit Ir baider aufgedrugkten Insigiln In und Irn Erben an schaden. Geben ze Newnburg markthalben an Sambstag vor dem auffarttag Anno domini M° CCCC° Tricesimotertio.

Source Fulltext: Peter Peusquens