Wir Albrecht von gotes gnaden Hertzog ze Oesterreich, ze Steyr, ze Kêrnden, und ze Krain, Marggraf ze Mêrhern, und Graf ze Tyrol etc. Bekennen. Daz wir unserm getrewn, Hainreichen dem Mosmann, unserm Burgêr ze Wienn, ze kauffen geben haben, und geben auch wissentleich mit dem brief, ain haws daselbs ze Wienn in der Judengassen, ze nachst Jacoben von Velach haws gelegen, genant die Cantorey, das nach der Juden venkhnuss an uns ist koemen, umb zway-hundert phunt phening, der wir gantz, und gar entrichtet und gewert sein. Also daz derselb Mosman, und sein erben, dasselbs haws mit seiner zuegehoerung, nu fuerbazzer in kaufs weis ynnhaben, nuetzen, und niessen, und iren frumen, damit schaffen suellen und muegen, wie In das am pesten fueget, oder wolgevellt, als kaufs, und der Stat ze Wienn Recht ist ungevêrleich. Wir suellen und wellen auch darauf ir herr und scherm sein vor gewalt und unrecht. Mit urkund des briefs. Geben ze Wienn, an Ertag nach sant Peter und sant Pauls tage. Nach Kristi gepurde viertzehenhundert Jar, darnach in dem drewunddreyssigisten Jare. d. d(ux) per m(agistrum) hubarum ad relacionem Osw(aldi) Obernd(orfer), notarii s(ui).

Source Fulltext: Peter Peusquens