Ich Jacob und Ich Wulfing und Ich Anndre und Ich Ott geprueder und gevetteren von Stubenberg Obrist Schenckhen In Steiren, wier empieten den erberen und weisen Kuenratten dem Holtzel dietzeit Buergermayster, und des Ratts gemayn der Stat ze Wienn, unser dienst. Wier lassen ew wissen, daz uns ingeantwuert ist nach geschêfft dez durichlewchtigen Hochgeboren fuersten Hertzog Albrechts Hertzoge ze Oesterreich und Marggraff ze Mêrhern etc. unsers genêdigen herren Ayn hawss gelegen in der Pippinger strass ze Wienn ze nagst dez pharrêr von Palterndorff hawss, und daz hern Jorgen von Potendorff unsers ohaym seligen gewesen ist, an der geltschuld so uns der yetz genant her Jorg von Potendorff unser ohaym sêliger schuldig ist, daz selb hawss wir nu verrer verkaufft haben dem edlen herren unserm lieben ohaym hern Hannsen von Kuenring, und sein erben. Bitten wier ew mit suenderm vleyss yr wellet ym das selb hawss fertigen, und der Stat ze Wienn GrundInsigel an den kauffbrieff den wier In dar uber geben, den yr dan woll vernemen werdet, hachen. Daz wellen wier mit vleyss geren umb ew verdiennen. Dez ze urkuend geben wier ew den brieff verpetschafft mit unser obgenanten Jacobs Wulfings Anndres und Otten von Stubenberg aller vierer auffgedruckhten petschafft. Geben zue Kapphffenberg nach kristi gepurd viertzechenhuendert und ym dreyunddreyskigistem Jare am Phintztag nach Sand Bartholomês tag.

Source Fulltext: Peter Peusquens